الكاتب : فرج الحوار

الفيلم الأول:
The sunset limited (2011)
الفيلم الثاني :
my dinner with André (1981)
الكتاب:
الجريمة - فرج الحوار 2017
القاسم المشترك بين الثلاث أعمال هذي هو إنها مبنية بصفة حصرية على الحوار. زوز من الناس يتناقشو في مكان محدد، عادة يكون ضيق و فيه بعض الاكسسوارات باش تثري المشهد. في الفيلم الأول عندنا زوز شخصيات، واحد مؤمن مسيحي يحاول قرابة الساعتين يقنع شخصية أخرى وقفت باها الزنقة و قررت تنتحر، إنها ماتنتحرش. في دار متكونة من بيت وحدة يتحاججو الشخصيتين بين بعضهم، كل واحد و حجتو، كل واحد و طريقتو، كل واحد و اطروحتو. في الفيلم الثاني عندنا زوز شخصيات مرة اخرى، زوز مسرحيين يعديو اكثر من الساعتين يتحاورو في مطعم فخم. الزوز هوما عبارة على صحاب قدم كل واحد شد طريقو و لقاءهم في المطعم هو محاورة حول كل ما استنتجو كل واحد فيهم، و كل ماتغير في آراءهم و مواقفهم من الحياة خلال فترة غيابهم على بعضهم. في الأفلام الزوز مافماش حركة، الحدث غايب تماما، بمعنى، المتفرج مطلوب منو يسمع أكثر من أي حاجة اخرى و الفرجة دورها استقصاء تفاصيل وجه الشخصيات و تفاعلها مع كلام بعضها. رواية الجريمة ، حاجة تقرب برشا للأفلام الزوز، رواية بدون مقدمات، مثلي جنسي يزور عراف في العيادة متاعو و يدخل ديراكت في صلب الموضوع. ميا و ثمنية و ثمانين صفحة هوما خلاصة ثلاث سوايع حوار بين زوز شخصيات متناقضين على جميع الاصعدة يدور في صالة صغيرة كل مافيها بيرو و نفاضة و رف كتب، و لوحة سوقية معلقة في الحيط فاها أيل مظروب بكرتوش الصيادة و الكلاب دايرة بيه و هو متلفتلهم. ال يخلي الكتاب يكون أكثر إثارة ربما من الأفلام الزوز رغم أنو من جنسهم نجمو نستنتجوه من إحالة الكاتب قبل ماتبدى الرواية لجورج باتاي، الإحالة هذي وحدها تعطينا ومضة صغيرة على اللون ال باش يميز الكتاب، نسبة "القرف و الدنائة" ال نلقاوها في اللغة، الحركات ال يقوم باها المثلي، المشهد النهائي بيدو، كلهم يوصللونا ميساج واحد، ال نحنا نسميوه وسخ هو حاجة موجودة فينا بالطبيعة و التنكر لاها ماعندو فين يوصلنا..كلنا مذنبين و شواطن بدون استثناء. ال يميز شوي الكتاب زادا على الافلام الزوز، هو الحركية الكبيرة ال تقوم باها الشخصية مقارنة بضيق الإطار المكاني. النهاية غير متوقعة، مفزعة و مخادعة، كتاب مباغت بلغة كاسحة و معتقة، إذا أنت انسان واثق بررشا من بعض مواقفك، هذا حوار يقلقك. و هذي الغاية في اللخر من النوع هذا من الأعمال.ناشر الكتاب هو دار زينب للنشر و التوزيع، تصميم الغلاف ممتاز و الطبعة رشيقة و تخلو من كل نقص. زوز أفلام و كتاب، ثلاثة حوارات وجها لوجه، ستة شخصيات بزوايا نظر مختلفة، زوز مخرجين و كاتب، ثلاثة من البشر ال خاطرو بالأكشن على حساب الديسكوسيون... و ال هو لو نركزو شوي، الأصل في كل شي، بما أنو كل انسان يخوض مالانهاية من الحوارات مع روحو، قبل لا يتحرك .